रौतहटमा लागुऔषध गाँजा र अवैध हतियारसहित एकजना पक्राउ परेका छन् ।
गौर नगरपालिका- ४ टिकुलियाका २१ वर्षीय सावन गिरी कटुवा पेस्तोल, गोली र गाँजासहित पक्राउ परेका हुन् ।
भारतीय सीमासँग जोडिएको ईशनाथ नगरपालिका- १ बन्जरहा झुलुङ्गे पुलबाट कटुवा पेस्तोल १ थान, गोली ४ राउण्ड र १ सय ९ किलो गाँजासहित गिरीलाई पक्राउ गरिएको रौतहट प्रहरीले जनाएको छ ।
विशेष सूचनाको आधारमा जिल्ला प्रहरी कार्यालय रौतहटबाट इन्स्पेक्टर उमाशंकर गुप्ताको कमान्डमा गएको टोलीले सोमबार राति गुप्तालाई पक्राउ गरेको जिल्ला प्रहरी कार्यालय रौतहटले जनाएको छ ।
लालबकैया केराघारी हुँदै टाउकोमा गाँजाको बोरा बोकेर भारततर्फ गइरहेका गिरीलाई प्रहरीले देखेपछि गाँजा फालेर भागेका थिए । त्यसपछि प्रहरी टोलीले उनलाई लखेटेर नियन्त्रणमा लिएका थिए ।
पक्राउ परेका गिरीमाथि लागुऔषध तथा हातहतियार खरखजाना सम्बन्धी मुद्दा दायर गरी जिल्ला अदालत गौरबाट म्याद थमाएर थप अनुसन्धान भइरहेको र घटनामा संलग्न अन्य व्यक्तिको पहिचान तथा खोजतलास गर्ने काम भइरहेको जिल्ला प्रहरी कार्यालय गौरले जनाएको छ ।
