चलचित्र ‘द ब्ल्यु लाइट’ निर्माणको घोषणा गरिएको छ । निर्माणपक्षले मंगलबार थिम पोस्टर सार्वजनिक गर्दै चलचित्र निर्माणको घोषणा गरेको हो ।
‘द ब्ल्यु लाइट’लाई बलिराम चौहानले निर्देशन गर्नेछन् । चौहान अहिलेको प्रतिक्षित चलचित्र ‘बलिदान’को लेखक तथा मुख्य सहायक निर्देशक हुन् । चौहानको यो डेब्यु निर्देशन हो ।
स्काइफल पिक्चर्सको प्रस्तुति रहने ‘द ब्ल्यु लाइट’को को-प्रोडुसरको रुपमा रमन ग्रे रहनेछन् । ‘द ब्ल्यु लाइट’लाई नरेन्द्र मैनालीले खिच्नेछन् ।
‘द ब्ल्यु लाइट’ सन् २०२५ भित्रै रिलिज हुने निर्देशक चौहानले बताएका छन् ।
चलचित्रको थिम पोस्टरमा नामजस्तै नीलो कलरको बीचमा एक बालिका उभिएकी छन् । उनको शरीरको कम्मरदेखि माथिको पछिल्लो भाग देखिन्छ । जुङरुङ्ग फिँजारिएको कपाल छ । उनको अगाडि नीलो कलर छ । नीलो बादलजस्तो पनि देखिन्छ । बालिकाको गेटअप र अवस्था हेर्दा उनी विक्षिप्त हुन् कि भन्ने सामान्य अनुमान लगाउन सकिन्छ । तर प्रस्ट छैन ।
निर्देशकले थिम पोस्टरले भन्न खोजेको के हो, चलचित्रको कथा के हो प्रस्ट पारेका छैनन् । उनले कलाकारबारे पनि केही जानकारी दिएका छैनन् । केही समयपछि कलाकारको लाइनअप सार्वजनिक गर्ने निर्देशक चौहानले बताएका छन् ।
‘हामी विस्तारै चलचित्रबारे थप जानकारी दिँदै जानेछौं । कलाकारका लागि पनि केहीसँग कुरा भइरहेको छ, फाइनल भएपछि जानकारी दिन आउने छौं,’ निर्देशक चौहानले भने, ‘अहिले बनारमा नाम चलेका प्रमुख कलाकारहरू नै हाम्रो सिनेमामा हुनुहुनेछ ।’
