नेपाली कांग्रेसले राष्ट्रिय स्वतन्त्र पार्टी (रास्वपा)लाई नैतिकताको विषयमा प्रश्न उठाउने नै नैतिक आधार नरहेको आरोप लगाएको छ ।
प्रतिनिधिसभाको आइतबारको बैठकमा रास्वपाको विरोधकैबीच बोल्दै कांग्रेसका प्रमुख सचेतक श्याम घिमिरेले रास्वपाका सभापति रवि लामिछानेविरुद्ध अदालतमा विचाराधीन मुद्दाहरू रहेको भन्दै नैतिकताको पाठ सिकाउन नहुने बताए।
‘पाँच/पाँच वटा अदालतमा सहकारी ठगी, सम्पत्ति शुद्धीकरण र संगठित अपराधका मुद्दा खेपिरहेका व्यक्तिलाई सभापति बनाउने पार्टीले अरुलाई नैतिकता सिकाउने ?', उनले प्रश्न गरे ।
उनले लामिछानेमाथि सर्वोच्च अदालतले पूर्पक्ष थुनामा पठाएको र उनी अझै निर्वाचन आयोगको सूचीमा रास्वपाको सभापति पदमा रहेको उल्लेख गरे। साथै, लामिछाने नै अहिले पनि रास्वपाको संसदीय दलको नेता रहेको र संसद् सदस्यबाट निलम्बन भइसकेको व्यक्तिलाई नेताको रूपमा राखेर बस्ने पार्टीले नैतिकताको पाठ सिकाउन मिल्दैन भने।
गृहमन्त्री रमेश लेखकमाथिको राजीनामा माग गर्दै रास्वपा र राप्रपाले लगातार रुपमा प्रतिनिधिसभा बैठक अवरुद्ध गरिरहेका छन् ।
