स्वास्थ्य सेवा सुधारमा कागेश्वरी मनोहराको छलाङ, छैटौँबाट तेस्रो स्थानमा उक्लियो

काठमाडौंका स्थानीय तहमध्ये कागेश्वरी मनोहरा नगरपालिका स्वास्थ्य सेवाको क्षेत्रमा तेस्रो स्थान हासिल गर्न सफल भएको छ । विभिन्न स्वास्थ्य सेवाका सूचकहरुका आधारमा कागेश्वरी तेस्रो भएको हो । यसअघि छैटौँ स्थानमा रहेको यो नगरपालिकाले ७३ अंक प्राप्त गरी यसवर्ष तेस्रो भएको हो ।

बागमती प्रदेश सरकार स्वास्थ्य तथा सामाजिक विकास मन्त्रालय स्वास्थ्य निर्देशनालय अन्तर्गतको काठमाडौं जिल्ला जनस्वास्थ्य कार्यालयद्वारा आज आयोजित आर्थिक वर्ष २०८२/०८३ को वार्षिक समीक्षा कार्यक्रममा कागेश्वरी मनोहरासहित ७५ अंकसहित प्रथम भएको चन्द्रागिरि र ७३.५ अंकसहित दोस्रो भएको शंखरापुर लगायत उत्कृष्टमा पर्न सफल नगरपालिकालाई प्रमाणपत्र प्रदान गरिएको थियो ।

नगर प्रमुख उपेन्द्र कार्की, उपप्रमुख शान्ता थापा, सम्पूर्ण जनप्रतिनिधिहरू, स्वास्थ्य शाखा, स्वास्थ्य संस्थाका प्रमुख तथा सम्पूर्ण स्वास्थ्यकर्मी, महिला सामुदायिक स्वास्थ्य स्वयंसेविका, कर्मचारी एवं सम्बन्धित सबैको योगदानबाट नै यो सफलता प्राप्त भएको जनाउँदै नगरपालिकाको तर्फबाट सबैमा हार्दिक आभार तथा उच्च सम्मान प्रकट गरेको छ । सुरुका दिनदेखि नै नगरप्रमुख कार्की नेतृत्वको जनप्रतिनिधिको टिमले स्वास्थ, शिक्षा र प्रविधिको क्षेत्रमा उल्लेख्य काम गर्दै आएको छ ।