नेपाल कम्युनिस्ट पार्टी राष्ट्रिय एकता अभियानका संयोजक एवं राष्ट्रियसभा सदस्य वामदेव गौतमले नेकपा एकीकृत समाजवादीसँग पार्टी एकताका लागि वार्ता भइरहेको बताएका छन् ।
एमालेका पूर्वउपाध्यक्षसमेत रहेका गौतमले रासससँगको अन्तर्वार्तामा पार्टी एकताका लागि एकीकृत समाजवादीका अध्यक्ष माधव नेपालसँग वार्ता सुरु भएको बताएका हुन् ।
‘पार्टी मात्रै खोलेर राम्रो हुँदैन । कम्युनिस्ट पार्टीबीचमा एकता गर्दै जानुपर्छ भन्ने उद्देश्यले नेकपा एकीकृत समाजवादीसँग एकताका निम्ति छलफल भइरहेको छ,’ उनले भनेका छन्, ‘अध्यक्ष तथा पूर्वप्रधानमन्त्री माधवकुमार नेपाललगायतका नेतासँग वार्ता सुरु भएको छ ।’
यसअघि पार्टी एकताका लागि नेकपा एमालेसँग पहल गरेको तर उसले पहिले आऊ भनेर पछि ढोका बन्द गरेको गुनासो पनि गौतमले गरेका छन् ।
‘केही समयपहिला नेकपा एमालेसँग पार्टी एकताका निम्ति पहल गरिएकामा उहाँहरूले एकता हुँदैन, प्रवेश गर्न आए स्वागत छ भन्नुभयो,’ उनले भनेका छन्, ‘त्यहीअनुसार तयार भइयो, उहाँहरूले नै ढोका बन्द गर्नुभयो ।’ आफ्ना लागि दुवै पार्टी एमाले नै भएको पनि उनले बताएका छन् ।
