मकवानपुरको हेटौंडा उपमहानगरपालिका–१७ गैरीगाउँमा सडक भासिँदा एउटा गाडी खाल्डोमा हराएको छ। माछा बोकेको ना ४ च ४८३३ नम्बरको गाडी कच्ची सडक भासिएर जमिनभित्रै हराएको हो।
जिल्ला प्रहरी कार्यालय मकवानपुरका अनुसार शुक्रबार दिउँसो करिब १ बजेतिरको समयमा सडक छेउमा माछा पालन गरिएको पोखरी नजिक रहेको कच्ची सडक भासिँदा गाडी हराएको हो।
गाडीका चालक हरि राई र सहचालकले समयमै गाडीबाट उत्रेर ज्यान जोगाएका छन्। उनीहरू बाहिरिनासाथ करिब पाँच सेकेन्डमै गाडी हिलोसहितको खाल्डोमा पुरिएको प्रहरी नायब उपरीक्षक (डीएसपी) श्यामु अर्यालले जानकारी दिए।
उनका अनुसार उक्त क्षेत्रमा अघिल्लो समय बोरिङको लागि खाल्डो खनिएको थियो। पानी ननिस्केपछि त्यही खाल्डो खुलै छाडिएको र त्यस वरपरको जमिन कमजोर भएर सडक भासिएको हुनसक्ने स्थानीयवासीले बताएका छन्।
