बागमती प्रदेशका मुख्यमन्त्री इन्द्रबहादुर बानियाँले आफू पदको लागि र फोटो टाँस्नका लागि मात्रै मुख्यमन्त्री नभएको बताएका छन् ।
नेपाल किसान महासंघ बागमती प्रदेशको प्रथम अधिवेशनलाई बिहीबार उद्घाटन गर्दै उनले यस्तो बताएका हुन् । पारदर्शी, उत्तरदायी र जनताप्रतिको जिम्मेवारी भएर काम गर्ने लक्ष्यसहित आफू मुख्यमन्त्री भएको उनको भनाइ छ ।
अरु मुख्यमन्त्रीले के गरे गरेनन् भन्दा पनि आफूले काम गरेर देखाउने उनले बताए । उनले आफूले मुख्यमन्त्री भएपछि पहिलो निर्णय नै प्रदेशभित्र रहेका गरिब विपन्नहरुको पक्षमा हुनेगरी गरेको जानकारी दिए । गरिब, विपन्न, सीमान्तकृत, दलित, चेपाङ, जिरेल, भोटे, बनकरियाहरुमध्येका छोराछोरीलाई प्रदेश सरकारले २/२ वटा मेडिकल डाक्टर, आयुर्वेद डाक्टर र पशु चिकित्सक डाक्टर गरी ६ जनाललाई छात्रवृत्तिमा डाक्टर पढाउने बताए । प्रदेश सरकारले गरिबका १० वटी छोरीलाई नर्स पढाउने निर्णय पनि गरिसकेको उनले जानकारी दिए ।
‘पारदर्शी, उत्तरदायी, जिम्मेवारी र जनताप्रतिको जिम्मेवारी भएर काम गर्ने लक्ष्यसहित म मुख्यमन्त्री भएको हो । पदका लागि, फोटो टाँस्न म मुख्यमन्त्री भएको होइन । त्यसकारणले मैले पहिले नै सन्देश दिइसकेको छु,’ उनले भने, ‘अर्को कुरा म आफैँले पाउने सेवा सुविधा, मुख्यमन्त्रीको हैसियतले पाउने सुविधा म लिन्नँ ।’
बानियाँले आफूले मुख्यमन्त्रीको हैसियतले पाउने तलब-भत्तालगायत सुविधा पनि नलिने बताए । आफूले पाउने तलबभत्ता आफ्नो निर्वाचन क्षेत्रलगायत गरिब, निमुखा जनताको पक्षमा काम गर्न दिने जानकारी दिए ।
