काठमाडौं, फागुन २० :
कार्यवाहक प्रमुख निर्वाचन आयुक्त रामप्रसाद भण्डारीले मतपेटिकाको सुरक्षामा कुनै पनि सम्झौता नहुने बताएका छन् । बुधबार आयोगमा आयोजित पत्रकार सम्मेलनका क्रममा भण्डारीले मतपेटिका साटिने भनी चलाइएका हल्लाहरू पूर्णतः निराधार र भ्रामक रहेको बताएका छन् ।
दुर्गम क्षेत्रबाट मतपेटिका ल्याउन नेपाली सेनाको हेलिकोप्टर प्रयोग गर्न लागिएको भन्दै उनले मतपेटिका साटिने हल्लामा विश्वास नगर्न आग्रह गरे । उनले मतदान सम्पन्न भएपछि राजनीतिक दल र उम्मेदवारका प्रतिनिधिहरूको रोहवरमा मतपेटिका सिल गरिने र त्यसमा प्रतिनिधिहरूको आफ्नै चिह्न अंकित लाहाछाप लगाइने जानकारी दिए ।
मतपेटिका सुरक्षाका लागि बाहिरी घेरामा नेपाली सेना, बीचको घेरामा सशस्त्र प्रहरी बल र भित्री घेरामा नेपाल प्रहरी रहने पुरानै व्यवस्था कायम रहेको उनले जानकारी दिए ।
