नेपाली कांग्रेसका निवर्तमान कार्यवाहक सभापति पूर्णबहादुर खड्काले चौधौँ महाधिवेशनबाट चुनिएका आफू पक्षधर केन्द्रीय सदस्यहरूको बैठक बोलाएका छन् ।
बैठक आज दिउँसो १२ बजे धुम्बाराहीस्थित स्मार्ट होटलमा बस्ने बताईएको छ ।
पार्टीको आधिकारिकताका विषयमा सर्वोच्च अदालतको फैसला आएसँगै खड्का समूह छलफलमा जुटेको हो ।
आज बस्ने बैठकमा १५औँ महाधिवेशनमा के गर्ने भन्ने विषयमा छलफल हुने बताइएको छ ।
सर्वोच्च अदालतले विशेष महाधिवेशनलाई मान्यता दिएपछि असन्तुष्ट रहेका पूर्वसभापति शेरबहादुर देउवा पक्षको नेतृत्व गरेका नेता खड्काले हिजो आफ्नै निवासमा आफू निकटका नेताहरु बोलाएर छलफल गरेका थिए । सो बैठकले अदालतको निर्णयलाई स्वीकार गर्ने निर्णय गरेको थियो।
खड्काले नेताहरु विमलेन्द्र निधि, डा. शशांक कोइराला, कृष्ण सिटौला, प्रकाशमान सिंह, डा. प्रकाशशरण महत, एनपी साउद, मीन विश्वकर्मा, रमेश लेखक लगायतका नेताहरुसँग छलफल गरेका थिए ।
सो छलफलपछि देउवा निकटका केन्द्रीय सदस्यहरुको बैठक आज बोलाइएको हो ।
