अमेरिकी राष्ट्रपति निर्वाचित डोनाल्ड ट्रम्पले राष्ट्रिय सुरक्षा र आर्थिक लाभको कारण देखाउँदै पनामा नहर, क्यानाडा र ग्रिनल्यान्ड प्राप्त गर्ने आफ्नो आह्वान क्रिसमस शुभकामनामा दोहोर्याउनुभएको छ ।
हिजो आफ्नो सामाजिक सञ्जाल प्लेटफर्म ट्रुथ सोसलमा शृृङ्खलाबद्ध पोस्टमार्फत उहाँले अमेरिकाका लागि यी क्षेत्रहरूको महत्त्वबारे आफ्नो लामो समयदेखि रहेको धारणा दोहोर्याउनुभयो ।
ट्रम्पले क्यानाडाका गभर्नर जस्टिन ट्रुडोलाई पनि मेरी क्रिसमस, जसको नागरिक कर धेरै उच्च छ तर यदि क्यानाडा हाम्रो ५१ औँ राज्य बन्यो भने उनीहरूको कर ६० प्रतिशतभन्दा बढी कटौती हुनेछ, उनीहरूको व्यवसाय तुरुन्तै आकारमा दोब्बर हुनेछ र उनीहरूलाई विश्वका कुनै पनि देशले नपाएको सैन्य सुरक्षा प्राप्त हुनेछ भन्ने कुरा शुभकामनामा उल्लेख गर्नुभएको छ ।
त्यस्तै ग्रिनल्यान्डका जनतालाई पनि जुन संयुक्त राज्य अमेरिकालाई राष्ट्रिय सुरक्षा प्रयोजनका लागि आवश्यक छ र जसले अमेरिका त्यहाँ हुनुपर्छ भन्ने चाहन्छन् र हामी गर्नेछौँ भन्ने भनाइ ट्रम्पको छ ।
ट्रम्पले लामो समयदेखि ग्रिनल्यान्डमा चासो व्यक्त गर्दै यसको स्वामित्वलाई ‘विश्वभर राष्ट्रिय सुरक्षा र स्वतन्त्रताका लागि’ आवश्यक रहेको बताउनुभएको छ ।
उहाँले पनामा नहरलाई ‘अमेरिकाको अर्थव्यवस्था र राष्ट्रिय सुरक्षामा यसको महत्त्वपूर्ण भूमिकाका कारण संयुक्त राज्य अमेरिकाका लागि महत्त्वपूर्ण राष्ट्रिय सम्पत्ति’ को रूपमा पनि उल्लेख गर्नुभयो ।
ट्रम्पले क्यानाडालाई पनि कटाक्ष गर्दै ‘क्यानाडाले संयुक्त राज्य अमेरिकाको ५१ औँ राज्य बन्ने विचार गर्नुपर्छ किनभने यो कदमले क्यानाडालीहरूलाई कम कर र सैन्य संरक्षणको माध्यमबाट फाइदा पुग्नेछ’ भन्नुभयो ।।
