नेकपा एकता अभियानका संयोजक वामदेव गौतम पुनः नेकपा एमालेमा फर्कने भएका छन्।
कुन पद लिएर कहिले जाने हो भन्ने विषय भने टुंगो लागि नसकेको गौतमको भनाइ छ । उनले भने, ‘जाने तय भैइसक्यो। समय र स्थान सबै उतै(एमाले)बाट आउँछ।' लामो समय एमालेमा रहेका गौतम पार्टी विभाजनपछि एकता अभियानमा लाग्दै आएका थिए ।
यसअघि गौतम नेकपा एकीकृत समाजवादीमा वरिष्ठ नेता भएर जाने निश्चित भइसकेको थियो । अध्यक्ष माधव नेपालसँग पनि उनले पटक-पटक वार्ता गरेका थिए। के कुरामा चित्त नबुझेर उनी फेरि एमालेमै फर्कन खोजे भन्ने स्पष्ट भएको छैन ।
यसैबीच, एकता अभियानका संयोजक नै एमालेमा जाने भएपछि अभियानका चार उपाध्यक्ष पनि नेकपा माओवादी केन्द्रसँग एकता गर्ने निर्णणमा पुगेका छन् ।उनीहरुले आज (आइतबार) काठमाडौंमा पत्रकार सम्मेलन गरेर एकता राष्ट्रिय अभियान परित्याग गरेको घोषणा गरेका छन् ।
अभियानका उपाध्यक्ष एवम् लुम्बिनी प्रदेश इन्चार्ज महेन्द्र अर्याल, उपाध्यक्ष एवम् कर्णाली प्रदेश इन्चार्ज डिल्लीराज भट्टराई, उपाध्यक्ष एवम् कोशी प्रदेश इन्चार्ज इन्द्र सुब्बा र उपाध्यक्ष एवम् मधेश प्रदेश इन्चार्ज हरि काफ्लेले वामदेवको साथ छोडेको घोषणा गरेका हुन् ।
