हलो र जुवासहित काठमाडौंमा मोही किसानको प्रदर्शन [भिडियो/फोटो फिचर]

स्वर्गद्वारी आश्रमका मोही किसानले जग्गामा एकल स्वामित्वको माग गर्दै आन्दोलनमा उत्रिएका छन् ।  द्वैद्य स्वामित्व अन्त्य गर्दै किसानको नाममा हुनुपर्ने माग गर्दै गुठी पीडित किसानहरु अहिले काठमाडौं आएर प्रदर्शन तथा धर्ना दिइरहेका छन् । उनीहरु आफ्नो मौलिक पहिरहनमा हलो जुवासहित प्रदर्शनमा उत्रिएका छन् ।

आन्दोलनमा उत्रिएका किसानले माग सम्बोधन नभएसम्म आन्दोलन नरोकिने समेत बताएका छन् । स्वर्गद्वारी आश्रमको दाङमा रहेको सात सय ५३ बिगाहा जग्गामा मोही कायम छ ।

मोहियानी हकका लागि भएका विभिन्न चरणका आन्दोलन र सरकारसँग पटकपटक सम्झौता भएपनि त्यसको कार्यान्वयन नभएको किसानहरुको गुनासो छ ।
किसानहरूले अबको आन्दोलन निर्णायक भएको स्वर्गद्वारी गुठी पीडित मोही किसान सङ्घर्ष समितिका अध्यक्ष प्रभु चौधरीले जानकारी दिए ।

माग कार्यान्वयनका लागि अहिले उनीहरु काठमाडौं आएका छन् ।उनीहरुले २४ घण्टे धर्नादेखि पूर्व पश्चिम राजमाग बन्द, विभिन्न राजनीतिक दल तथा प्रदेश सरकारलाई ज्ञापनपत्र बुझाउने लगायतका कार्यक्रमहरू समेत गरिसकेका छन् ।

सर्वोच्च अदालतले २०६२ चैत्र १४ गते स्वर्गद्वारी विशेष प्रकारको निजी गुठी भएकाले आश्रमको जग्गा खण्डीकरण नगर्नु नगराउनु भन्ने परमादेश जारी गरेका कारण किसानहरू मोही हकबाट वञ्चित भएका छन् ।