ग्रेनाइट बिछ्याएर चिटिक्क पारिँदै दरबारमार्गको पैदल मार्ग [भिडियो/तस्बिर]

काठमाडौं महानगरपालिका पछिल्लो समय सहरी सौन्दर्यलाई बढाउन र व्यवस्थित बनाउने कार्यमा तल्लीन छ ।

काठमाडौंको न्युरोड क्षेत्रबाट मोटरसाइल पार्किङ हटाएर सहरलाई व्यवस्थित र सुन्दर बनाउन सुरु गरेको महानगरले अहिले  दरबारमार्ग क्षेत्रको सडकपेटीमा ग्रेनाइट बिछ्याउन थालेको छ ।

महेन्द्र सालिक चोकदेखि नारायणहिटी दरबारनजिकको महानगर प्रहरी वृत्त क्षेत्रसम्म ग्रेनाइट बिछ्याइँदै छ । कालो रङको ग्रेनाइटले सडकपेटीलाई सुन्दर र चम्किलो देखाएको छ ।

काठमाडौं महानगरपालिकामा मेयर बालेन्द्र शाह निर्वाचित भएदेखि नै काठमाडौंको मुहार फेर्ने काम भइरहेको छ । बानेश्वर-माइतीघर सडकमा फूलसहितको गमला राखेर सहर सौन्दर्यीकरणमा जुटेको महानगरले सडकका पोलमा बत्ती बेरेर रातमा दुलही झैं देखिने बनाएको छ ।

यस्तैगरी सधैंजसो भिड हुने न्युरोड क्षेत्रबाट तारहरुलाई भूमिगत गरेर पैदलयात्रु हिँड्ने ठाउँ फराकिलो पारिएको छ । यसबाट न्युरोड क्षेत्रमा सुन्दर त देखिएको छ नै हिँडने पैदलयात्रुलाई पनि सहज भएको छ ।

जुद्ध शालिकदेखि इन्द्रचोकसम्म दायाँबायाँका घरहरुमा सेतो रङ लगाएर सहरलाई उज्यालो बनाइएको छ ।

हेरौं कालो ग्रेनाइट बिछ्याएर चिटिक्क पारिँदै गरेको दरबारमार्ग क्षेत्रको पैदल मार्गका थप तस्बिर :