पूर्वराजालाई प्रचण्डको सुझाव : पार्टी खोलेर चुनाव लड्न आए हुन्छ

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले पूर्वराजा ज्ञानेन्द्रलाई पार्टी खोलेर चुनाव लड्न सुझाव दिएका छन् ।

रौतहट गरूडाका उद्योगी तथा व्यापारीसँगको भेटघाटका क्रममा शनिबार बिहान सञ्चारकर्मीहरूले राखेका  जिज्ञासाको उत्तर दिँदै अध्यक्ष दाहालले राजतन्त्र पुनःस्थापना हुने कुरा असम्भव भएको स्प्रष्ट पारेका छन् ।

‘इतिहासको चर्खा कहिले पनि फर्कँदैन, उनले भने, यदी उहाँलाई सत्तामा आउने इच्छा भए पार्टी खोलेर, चुनाव जितेर आउन संविधानले छुट दिएको छ ।’  पछिल्लो समय पूर्वराजाको पक्षमा आन्दोलन बढ्दै गएपछि प्रमुख राजनीतिक दलका नेताहरु केही ससंकित भएका छन् ।

अर्को प्रसङ्गमा अध्यक्ष दाहालले गरूडामा रहेको श्रीराम सुगर मिल सञ्चालनको लागि सक्दो पहल गर्ने बताए । यस मिलसँग रोजगारी, आर्थिक विकास समेत जोडिएको हुँदा श्रीराम सुगर मिल सञ्चालनको लागि पार्टीको तर्फबाट सक्दो सहजीकरण गर्ने उनले प्रतिबद्धता जनाए ।

अध्यक्ष दाहालसहितको टोली माओवादी केन्द्रको  जनतासँग माओवादी तराई–मधेस जागरण अभिायनअन्तर्गत शुक्रबार साँझ रौतहट पुगेका हुन् ।