काठमाडाैं, फागुन ३० :
राष्ट्रिय परीक्षा बोर्ड (कक्षा १०) ले २०८१ सालको माध्यामिक शिक्षा परीक्षा (एसईई) को सम्पूर्ण तयारी पूरा भएको जनाएको छ ।
आगामी ७ चैतबाट सुरु हुने परीक्षाका लागि प्रश्नपत्र र उत्तरपुस्तिका सम्बन्धित केन्द्रहरूमा पठाइसकिएको र केही स्थानमा पुर्याउने प्रक्रिया जारी रहेको जनाइएको छ ।
परीक्षा नियन्त्रक नन्दलाल पौडेलका अनुसार सबै तयारी पूरा भइसकेको छ । सिम्बोल नम्बर, प्रश्नपत्र र उत्तरपुस्तिका सम्बन्धित परीक्षा केन्द्रहरूमा पुगिसकेको उनले बताए । यस वर्ष परीक्षा सञ्चालनका लागि २ हजार ७९ परीक्षा केन्द्र तोकिएका छन् ।
पछिल्लो तथ्यांकअनुसार यस वर्ष ५ लाख ८ हजार ३९० विद्यार्थी एसईईमा सहभागी हुँदै छन् । परीक्षाका लागि ५ लाख २२ हजार विद्यार्थीले फाराम भरेका थिए । परीक्षा केन्द्रहरूको सुरक्षाको जिम्मेवारी सम्बन्धित जिल्लाका सुरक्षा निकायले लिनेछन् ।
