‘शान्तिप्रक्रियालाई टुङ्गोमा पुर्‍याउन सबै दल एकजुट हुनुको विकल्प छैन’

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले शान्ति प्रक्रियालाई टुङ्गोमा पुर्‍याउन अब सबै दल एकजुट हुनुको अर्को विकल्प नरहेको बताएका छन् ।

नेपालको सक्रमणकालीन न्याय प्रक्रिया तथा द्वन्द्व पीडितहरूको सत्य, न्याय र परिपूरणीय अधिकार सम्बन्धी राष्ट्रिय सम्मेलनलाई आज सम्बोधन गर्दै पूर्व प्रधानमन्त्री समेत रहेका प्रचण्डले आफूले निकै ठुलो जोखिम उठाएर शान्ति प्रक्रियालाई टुङ्गोमा पुर्‍याउने प्रयत्न गरेको बताए । 

उनले टीआरसी विधेयक पारित भइसकेको र आयोग गठनका लागि सिफारिस समिति गठन भइसकेको भन्दै पीडितहरूलाई न्याय दिने प्रक्रियालाई प्राथमिकतामा राखेर काम गर्नुपर्नेमा जोड दिएका छन् । 

‘शान्ति प्रक्रिया कहिले कानुनी, कहिले प्राविधिक र कहिले राजनीतिक उतारचढावले ढिलो भएको स्वीकार गरे  । नेपालको शान्ति प्रक्रिया मौलिक रहेको उल्लेख गर्दै प्रचण्डले यहाँसम्म आउँदा धेरै जटिल विषयहरू कार्यसम्पादन हुँदै आएको स्मरण गराए । सेना समायोजन या संविधान निर्माणसँग सम्बन्धित होस्, यी दुवै सफलतापूर्वक सम्पन्न गरेको  उनको भनाइ थियो ।

उनले सबै राजनीतिक दलहरूबिच शान्ति प्रक्रिया टुङ्ग्याउन विमति नरहेको प्रस्ट पार्दै अब विधेयक संशोधनको कुरा आए पनि त्यसतर्फ लाग्दा थप ढिलाइ हुनसक्ने बताए । उनले सर्वोच्चको फैसलालाई सम्मान गरेर विधेयक टुङ्ग्याउनतिर लाग्नुपर्ने बताए ।

अध्यक्ष प्रचण्डले राजनीतिक तहमा तिक्तता बढोस् भन्ने नचाहेको भन्दै यस्तो राम्रो कामलाई निष्कर्षमा पुर्‍याउन सबै एक हुनुको विकल्प नभएको स्पष्ट पारे ।