राष्ट्रिय मानव अधिकार आयोगले राजावादीहरुको शुक्रबारको प्रदर्शन हिंसात्मक भएको निष्कर्ष निकालेको छ । आयोगले एक विज्ञप्ति जारी गरी अनुगमनको क्रममा राजावादीहरुको आन्दोलन हिंसात्मक देखिएको जनाएको छ ।
प्रहरीको घेरा तोडी प्रदर्शनकारीहरु बानेश्वरतिर जान खोज्दा आन्दोलन हिंसात्मक बनेको जनाइएको छ । प्रदर्शनकारी र सुरक्षाकर्मीबीच झडप भएको, प्रदर्शनकारीले प्रहरीमाथि ढुंगा प्रहार गरेको, व्यक्तिको घरमा ढुंगा हान्ने र आगजनी गर्ने काम भएको विज्ञप्तिमा उल्लेख छ ।
प्रदर्शनकारीले तीनकुनेमा व्यक्तिगत घर,सञ्चारमाध्यम, कलेजमा आगजनी र आक्रमण हुनुका साथै आगो निभाउन हिँडेको दमकल तथा सशस्त्रको गाडीमा समेत ढुंगा प्रहार गरेको आयोगले जनाएको छ ।
अनुगमन गर्न पुगेको आयोगको टोलीमाथि समेत प्रदर्शनकारीहरुबाट आक्रमण भएको जनाएको छ । प्रहरीले व्यक्तिको निजी आवास प्रयोग गरेर अश्रुग्यास प्रहार गरेको, भीड नियन्त्रणका लागि प्रहरीले पानीको फोहोरा र हवाई फायर गरेको पनि आयोगले जनाएको छ । आयोगले हिंसात्मक कार्यमा संलग्न जोकोहीलाई कानुनी दायरामा ल्याई कारवाही गर्न सरकारलाई आग्रह गरेको छ ।
