काठमाडौं, वैशाख २ :
तीनकुने हिंसात्मक प्रदर्शनका कमान्डर दुर्गा प्रसाईंविरुद्ध ज्यान मार्ने उद्योगको कसुरमा पनि अनुसन्धान सुरु गरेको छ । प्रसाईंविरुद्ध ज्यान मार्ने उद्योगको कसुरमा जाहेरी आएपछि प्रहरीले अनुसन्धान अघि बढाएको हो ।
गत १५ चैतमा तीनकुनेमा भएको प्रदर्शनमा मार्ने नियतले गाडीले पेल्दै अघि बढेको भन्दै उनीविरुद्ध ड्युटीमा खटिएका प्रहरीहरूले सामूहिक निवेदन दिएको बुझिएको छ । प्रहरीले प्रसाईंमाथि विभिन्न चारवटा कसुरमा अनुसन्धान अगाडि बढाएको छ ।
प्रहरीले उनीमाथि राज्यद्रोहको कसुर, संगठित अपराध र आपराधिक उपद्रवको कसुरमा पनि अनुसन्धान अगाडि बढाएको हो । ज्यान मार्ने उद्योगको कसुर प्रसाईंविरुद्ध सबैभन्दा बलियो मुद्दा बन्न सक्ने बताइएको छ ।
