अब सवारी चालक अनुमतिपत्र (लाइसेन्स)को अवधि १० वर्ष हुने भएको छ। प्रतिनिधिसभाले ‘केही नेपाल ऐन संशोधन विधेयक’पारित गरेसँगै सवारी तथा यातायात व्यवस्था ऐन २०४९ मा संशोधन गर्दै लाइसेन्सको अवधि दोब्बर बनाइएको हो ।
अहिलेसम्म लागू रहेको ऐनको दफा ५४ को उपदफा ३ अनुसार, चालक अनुमतिपत्रको वैधता पाँच वर्ष तोकिएको थियो। तर संशोधित विधेयक अनुसार अब उक्त उपदफामा रहेको ‘पाँच वर्षसम्म’ भन्ने शब्दलाई ‘दश वर्षसम्म’ मा परिवर्तन गरिएको छ । प्रतिनिधिसभाले मंगलबार विभिन्न ७९ वटा ऐन एकैपटक संशोधन गर्ने तथा दुई ऐन खारेज गर्ने ‘केही नेपाल ऐन संशोधन गर्ने विधेयक, २०८१’ पारित गरेको थियो ।
विधेयक अनुसार नयाँ लाइसेन्स मात्र होइन, नविकरण गरिएको लाइसेन्सको अवधि पनि अबदेखि १० वर्षका लागि मान्य हुनेछ । यो विधेयक तत्कालीन कानुन, न्याय तथा संसदीय मामिला मन्त्री धनराज गुरुङद्वारा संसदमा पेस गरिएको थियो। मंगलबार प्रतिनिधि सभाबाट पारित भएपछि अब यो विधेयक राष्ट्रिय सभामा प्रस्तुत हुनेछ। राष्ट्रिय सभाबाट पनि पारित भइसकेपछि विधेयक प्रमाणीकरणको लागि राष्ट्रपतिसमक्ष पठाइनेछ। राष्ट्रपतिको प्रमाणीकरणपछि यो ऐन लागू हुनेछ।
