नेपाली कांग्रेसका सांसद तथा उद्योगी विनोदकुमार चौधरीले नेपालको रोजगारीको समस्या पर्यटन र ऊर्जा क्षेत्रले समाधान गर्न सक्ने जनाएका छन् ।
प्रतिनिधि सभामा विशेष समयमा उनले सरकारले ऊर्जा क्षेत्रमा कार्ययोजना बनाएर काम थालेको भन्दै ऊर्जामन्त्रीलाई बधाईसमेत दिए । ‘ऊर्जाबाटै समृद्धि हासिल गर्ने लक्ष्यसहित कुन समयमा के गर्ने भनेर पहिलोपटक तालिका सार्वजनिक भएको’ चौधरीको भनाइ छ । ऊर्जा, जलस्रोत तथा सिँचाइमन्त्री दीपक खड्काले राम्रो काम गरेको उल्लेख गर्दै सांसद चौधरीले मन्त्रालयले पहिलोपटक १० वर्षभित्र २८ हजार ५ सय मेगावाट विद्युत् उत्पादन गर्ने लक्ष्यसहित काम सुरु गर्नु देशका लागि सुखद विषय भएको धारणा राखे ।
सरकारले सन् २०२५ देखि २०३५ सम्म २८ हजार ५ सय मेगावाट विद्युत् उत्पादन गर्ने कार्ययोजना ल्याई कार्यान्वयनमा ल्याइसकेको छ ।
सांसद चौधरीले उत्पादित विद्युत् स्वदेशमा खपत गर्ने र बाँकी भारत तथा बंगलादेशमा बिक्री गर्ने योजना रहेको उल्लेख गरे । विद्युत् विकासको मार्गचित्र ऊर्जामन्त्रीको योजनामा समेटिनु सिंगो सरकारको सफलता भएको उनको भनाइ थियो । नेपालले आन्तरिक खपतपछि बाँकी रहेको विद्युत् भारतमा १० हजार मेगावाट र बंगलादेशमा ५ हजार मेगावाट निर्यात गर्ने तयारी गरिरहेको पनि चौधरीले जानकारी दिए ।
उद्योगीसमेत रहेका सांसद चौधरीले विद्युत् प्राधिकरणका कार्यकारी निर्देशक हितेन्द्रदेव शाक्यले श्वेतपत्र सार्वजनिक गरी प्राधिकरणको वास्तविक अवस्था स्पष्ट पारेको बताए । ‘अहिलेको अवस्थामा प्राधिकरणले हिउँदको समयमा आन्तरिक खपतका लागि आवश्यक विद्युत् उत्पादन गर्न सक्दैन,’ उनले भने, ‘आगामी दुई वर्षसम्म बाह्य स्रोतबाट विद्युत् आयात गर्नुपर्ने स्थिति रहेको छ भन्ने इमानदार अभिव्यक्ति उहाँले दिनुभएको हो । वास्तविकता त्यही हो ।’
चौधरीले ऊर्जा क्षेत्रको विकासका लागि हाल ५ हजार मेगावाटका पीपीए भइसकेका आयोजनालाई छिटो अगाडि बढाउनुपर्नेमा पनि जोड दिए ।
