सरकारलाई सांसद चालिसेको ध्यानाकर्षण- मेलम्चीको मूल स्रोतमा बस्नेले नै पाएनन् पानी

उपत्यकामा खानेपानी आपूर्ति हुने प्रमुख केन्द्र सुन्दरीजलमै स्वच्छ पानीको अभाव देखिएको भन्दै काठमाडौं क्षेत्र नं ३ का प्रतिनिधिसभाका सांसद सन्तोष चालिसेले सरकारको ध्यानाकर्षण गराएका छन्।

प्रतिनिधिसभाको बिहीबारको बैठकको शून्य समयमा सांसद चालिसेले क्षेत्र नं ३ भरि खानेपानीको हाहाकार भएको बताए । 

सुन्दरीजलदेखि बौद्ध क्षेत्रसम्म जताततै खानेपानीको चरम अभाव भएको उल्लेख गर्दै स्थानीय बासिन्दाले मेलम्चीको पानी पाउने आशामा वर्षौंदेखि पर्खिरहेका भए पनि अझैसम्म स्वच्छ पानीबाट बञ्चित रहेको उनले गुनासो सुनाए ।

‘मेलम्चीको पानी यहीँ प्रशोधन गरी काठमाडौँ उपत्यकामा पठाइन्छ, तर पानीको मूल स्रोतमा बस्ने स्थानीयले भने त्यो सुविधा पाउन सकेका छैनन्,’ सांसद चालिसेले संसद्मा भने, ‘बागमतीको धमिलो पानी बिना प्रशोधन नै वितरण गरिँदा स्थानीयवासी आक्रोशित छन्।’ 

सुन्दरीजल क्षेत्रबाट काठमाडौं उपत्यकाभित्र ७० प्रतिशत पानी उपलब्ध हुने गरेको सांसद चालिसेले सदनमा जानकारी गराए ।

चालिसेले सुन्दरीजलदेखि चाबहिलसम्मका बासिन्दाले खानेपानी नपाएको गुनासो जनप्रतिनिधिहरूसम्म आइपुगेको जनाउँदै समस्या समाधानका लागि सम्बन्धित निकायको गम्भीर ध्यानाकर्षण गराए। 

उनले सरकारलाई मेलम्ची खानेपानी आयोजनाबाट प्रत्यक्ष प्रभावित क्षेत्रमा प्राथमिकताका साथ स्वच्छ र शुद्ध पानी आपूर्ति सुनिश्चित गर्न पनि आग्रह गरे।