काठमाडौं उपत्यकामा हावाहुरीसहित पानी परिरहेका बेला विभिन्न स्थानमा बत्ती झ्याप-झ्याप गएको छ ।
यसै क्रममा मुलुकको प्रमुख प्रशासनिक केन्द्र सिंहदरबारमा पनि बत्ती बसिरहेको बैठकमा मोबाइलको उज्यालो प्रयोग गर्नुपरेको छ । सिंहदरबारमा शुक्रबार साँझ शिक्षा उपसमितिको बैठक चलिरहेका बेला बत्ती जाँदा फोनको उज्यालोमा बैठकलाई निरन्तरता दिइएको हो ।
राष्ट्रिय स्वतन्त्र पार्टी (रास्वपा) की सांसद सुमना श्रेष्ठका अनुसार विद्युत् आपूर्ति बन्द हुँदा उपसमितिको बैठकलाई मोबाइलको उज्यालो बालेर निरन्तरता दिइएको हो ।
उपसमितिमा शिक्षा विधेयकबारे छलफल भइरहेको छ । शिक्षक आन्दोलनपछि सरकारले शिक्षा विधेयकलाई अघि बढाउन प्राथमिकता दिइरहेको छ ।
बिहीबारदेखि निरन्तर विद्युत् आउने-जाने हुँदा देशभरै समस्या भइरहेको छ ।
उसो त आजै नेपाल विद्युत् प्राधिकरणले शुक्रबार नै पत्रकार सम्मेलनमार्फत हिजो प्राविधिक कारणले विद्युत् सेवा अवरुद्ध भए पनि लोडसेडिङ सुरु नभएको दाबी गरेको छ ।
प्राधिकरणका कार्यकारी निर्देशक हितेन्द्रदेव शाक्यले इन्भर्टर र मैनबत्तीको दिन आए भन्दै सामाजिक सञ्जालमा अभिव्यक्त भनाइमा कत्ति पनि सत्यता नरहेको दाबी गरे । तर सामाजिक सञ्जालमा उनको चर्को आलोचना भइरहेको छ ।
यो पनि…
हितेन्द्रदेव शाक्यको दाबी- प्राविधिक समस्याले हिजो बिजुली अवरुद्ध भयो, फेरि लोडसेडिङ हुँदैन
