राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले प्रधानमन्त्री केपी शर्मा ओलीलाई हेलिकोप्टर चढेर भाग्न मौका दिने जवाफ फर्काएका छन्। राजावादी पक्षधरको आन्दोलनको तयारी बैठकमा उनले प्रधानमन्त्रीलाई यस्तो जवाफ फर्काएका हुन् ।
केही दिनअघि संसद्मा प्रधानमन्त्रीले भागेर कहाँ जाने भन्दै उमेरका हिसाबले पनि भाग्न सकिँदैन भनी अभिव्यक्ति दिएका थिए । ‘सम्झौता नगर्ने हो भने उहाँहरूलाई हेलिकोप्टरबाट जाने मौका दिनुपर्छ हामीले, ’ लिङ्देनले भने, ‘हेलिकोप्टरको सुविधा प्रयोग गर्ने छुट दिन्छौं ।’
लिङ्देनले जेठ १५ देखि सुरु हुने आन्दोलनलाई टुंग्याएरै छाड्ने बताए । उनले आन्दोलन शान्तिपूर्ण र आयोजकको पूर्ण नियन्त्रणमा हुने दाबी पनि गरे ।
आन्दोलनलाई नभड्काउन सरकारलाई चेतावनी दिँदै दमन गरेर हिंसामा भड्काउने मौका समेत नदिइने उनको भनाइ थियो । मानवअधिकार आयोग र अन्तर्राष्ट्रिय संघसंस्थालाई आन्दोलनको निरीक्षण गर्न पनि उनले आग्रह गरेका छन् ।
त्यस्तै, राप्रपा नेपालका अध्यक्ष कमल थापाले अबको आन्दोलनको अग्रपंक्तिमा केन्द्रीय नेता हुने बताए । कुटाइ खानुपरे अग्रभागमा रहेका नेताले खाने थापाको भनाइ थियो। उनले अबको आन्दोलन शान्तिपूर्ण हुने दाबी गर्दै ढुक्क भएर प्रदर्शनमा सहभागी हुन पनि आग्रह गरेका छन्।
