चितवन, साउन १० :
चितवनको राप्ती नगरपालिका–१ लोथर पुल नजिक भारतीय ट्रकबाट ठूलो मात्रामा गाँजा बरामद गरिएको छ।
शनिबार बिहान ४ बजे चितवन प्रहरीले यूपी ८२ टी ३९२१ नम्बरको भारतीय ट्रक जाँच गर्दा ६७१ किलो ६ सय ग्राम गाँजा बरामद गरेको हो।
ट्रक काठमाडौंतर्फ सामान पुर्याएर वीरगन्ज फर्कँदै थियो। प्रहरीले ट्रकको क्याबिनको माथिल्लो भागमा फल्स बटन बनाएर राखिएको अवस्थामा ४३ वटा पोका गाँजा फेला पारेको छ।
गाँजासहित ट्रकका चालक भारत पूर्वी चम्पारण, तुर्कालिया घर भएका ३७ वर्षीय शेख सविल अख्तरलाई प्रहरीले पक्राउ गरेको छ।
चितवन जिल्ला प्रहरी कार्यालयका अनुसार घटनाबारे थप अनुसन्धान भइरहेको छ।
