सुक्खाग्रस्त क्षेत्रमा सिँचाईका लागि प्रयोग हुने बिजुलीको मूल्य घटाइएको छ। नेपाल विद्युत प्राधिकरणका कार्यकारी निर्देशक हितेन्द्रदेव शाक्यका अनुसार अब किसानले सिँचाइका लागि प्रतियुनिट तीन रुपैयाँ मात्र तिर्नुपर्नेछ।
उनले किसानको समस्या राष्ट्रिय समस्या भएकाले यसको समाधानका लागि प्राधिकरण प्रतिबद्ध रहेको बताए। आठ रुपैयाँ पर्ने बिजुली किसानलाई मात्र तीन रुपैयाँमा उपलब्ध गराउने निर्णय गरिएको हो।
प्रधानमन्त्री केपी शर्मा ओलीले मधेसका सुक्खाग्रस्त जिल्लामा तत्काल ५ सय बोरिङ खन्ने घोषणा गरेपछि निर्देशक शाक्य विद्युत आपूर्तिको अवस्था बुझ्न जनकपुरधाम पुगेका थिए।
चितवनको विद्युत आपूर्तिको स्थलगत अवलोकनपछि मधेस प्रदेशका सिराहा, धनुषा, महोत्तरी, सप्तरी, सर्लाही लगायतका जिल्लामा प्राधिकरणका प्रमुखहरूसँग छलफल गरिएको शाक्यले जानकारी दिए।
उनका अनुसार सिँचाईका लागि आवश्यक बोरिङ कहाँ जाडिने हो भन्ने यकिन जानकारी सम्बन्धित निकायबाट प्राप्त हुन नसकेको छ। तर, डेढ महिनाभित्र सिँचाइ सुरु गर्नुपर्ने भएकाले तयारी तत्काल गर्न निर्देशन दिइएको छ।
बोरिङ जडानका लागि आवश्यक स्थान र पम्पको क्षमताबारे जानकारी दिन समेत सम्बन्धित निकायलाई आग्रह गरिएको छ। शाक्यका अनुसार अबको एक महिनाभित्रै बोरिङ जडानको काम सक्ने लक्ष्यसहित तयारी तीव्र पारिएको छ।
सिँचाइका लागि कहाँ र कसरी बोरिङ जडान गर्ने भन्ने विषयमा आफैं फिल्डमा खटिएर बुझ्न निर्देशन दिएको शाक्यले बताए।
