निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनका लागि कार्यतालिका सार्वजनिक गरेको छ। आयोगको सोमबार बसेको बैठकले कार्यतालिका स्वीकृत गरेको हो।
कार्यतालिका अनुसार मंसिर १ देखि १० गतेसम्म निर्वाचन प्रयोजनका लागि राजनीतिक दल दर्ता गर्न सकिनेछ। दल दर्ताका लागि इच्छुक सरोकारवालाले कात्तिक ३० गते अगावै राजनीतिक दल दर्ताको प्रमाणपत्र लिइसक्नुपर्ने आयोगले जनाएको छ।
पहिलो हुने निर्वाचित प्रणालीका लागि माघ २ गतेदेखि निर्वाचन अधिकृतको कार्यालय स्थापना हुनेछ भने समानुपातिक प्रणालीका लागि मंसिर १५ गते कार्यालय स्थापना हुनेछ। समानुपातिकतर्फको बन्दसूची पेस गर्ने मिति पुस १८ र १९ तोकिएको छ।
निर्वाचन प्रचारप्रसारको समय फागुन ३ देखि १८ गतेसम्म निर्धारण गरिएको छ। त्यसपछि प्रचारप्रसार निषेध अवधि लागू हुनेछ।
मतदान फागुन २१ गते बिहान ७ बजेदेखि बेलुका ५ बजेसम्म हुनेछ। मतदान सकिएपछि दुवै प्रणालीतर्फको मतपेटिका संकलनपछि मतगणना सुरु गरिने आयोगले जनाएको छ।
आयोगले निष्पक्ष, स्वतन्त्र र पारदर्शी निर्वाचनका लागि राजनीतिक दल तथा सरोकारवालासँग समय–समयमा समन्वय र छलफल गर्ने जनाएको छ।
