काठमाडौं, मंसिर २९ :
नेकपा एमालेका उपमहासचिव प्रदीप ज्ञवालीले महासचिवमा उम्मेदवारी दिन नपाएपछि केन्द्रीय सदस्यमा उम्मेदवारी दिएर चित्त बुझाउन बाध्य भएका छन् । अध्यक्ष केपी शर्मा ओलीको प्यानलबाट उपाध्यक्षको सूचीमा रहेका ज्ञवालीले महासचिवबाहेक अन्य पदमा आफ्नो इच्छा देखाएनन्।
ओलीको प्यानल बन्ने बेलामा उनलाई उपाध्यक्षको लिस्टमा राखिएको थियो । त्यसमा उनले सहमति जनाएनन् । उनले केन्द्रीय कमिटी सदस्यका लागि मनोनयन गर्दा गराएको बुझिएको छ ।
निकटस्थहरूसँग ज्ञवालीले भनेका छन्,‘म एमालेको पदाधिकारी थिएँ । अब कार्यकर्ता रहन्छु । पार्टीमा सबैलाई प्रतिस्पर्धा गर्ने समान अवसर हुन्छ भन्ने थियो,’‘एउटै व्यक्तिलाई दोहोर्याइराख्ने प्रवृत्ति उचित भएन । मेरो मन एकदमै दुखेको छ ।’ ओली प्यानलबाट महासचिवमा शंकर पोखरेल नै दोहोरिएका छन्।
