निर्वाचन आयोगले निर्वाचन आचारसंहिता २०८२ स्वीकृत गरेको छ। आयोगको आइतबार बसेको बैठकले आचारसंहिता पारित गरेको कार्यवाहक प्रमुख निर्वाचन आयुक्त रामप्रसाद भण्डारीले जानकारी दिए।
उनका अनुसार स्वीकृत आचारसंहिता माघको पहिलो साताबाट कार्यान्वयनमा आउनेछ। आगामी फागुन २१ गते प्रतिनिधि सभा सदस्यको निर्वाचन हुने कार्यतालिका छ।
यसअघि आयोगले निर्वाचन आचारसंहिता २०८२ को मस्यौदा तयार गरी सरोकारवालासँग राय–सुझाव मागेको थियो। प्राप्त सुझावहरू समेटेर आचारसंहिता अन्तिम रूप दिइएको आयोगले जनाएको छ। यसपटक आचारसंहिताको दायरा पहिलेभन्दा फराकिलो बनाइएको आयोगको दाबी छ।
कार्यवाहक प्रमुख निर्वाचन आयुक्त भण्डारीले भने, ‘पहिले सचेतनाको मोडलमा आचारसंहिता हुन्थ्यो, अहिले कारबाहीको मोडलमा छ। कार्यान्वयनको सवालमा भने पहिलेजस्तै ५०–५५ दिनअघि देखि नै लागु हुन्छ।’
तत्काल आचारसंहिता लागु गर्दा सरकारका नियमित कामकारबाहीमा असर पर्न सक्ने भएकाले त्यसलाई मध्यनजर गर्दै माघको पहिलो साताबाट लागु गर्ने निर्णय गरिएको उनले स्पष्ट पारे।
यसैबीच, आयोगले सार्वजनिक गरेको निर्वाचन कार्यतालिकाअनुसार आज र भोलि राजनीतिक दलहरूले समानुपातिक निर्वाचन प्रणालीतर्फको बन्द सूची आयोगमा पेस गर्नुपर्ने आयोगका प्रवक्ता नारायणप्रसाद भट्टराईले जानकारी दिए।
उनका अनुसार पुस १३ र १४ गतेसम्म पेस गरिएका समानुपातिकतर्फका बन्द सूचीहरूको पुस १५ देखि २० गतेसम्म छानबिन गरिनेछ। छानबिनपछि पुस २१ देखि २७ गतेसम्म सूची सच्याउन तथा मिलाउन दलहरूलाई समय दिइने आयोगले जनाएको छ।
