रेशमलाल चौधरीको रिटमा अन्तिम सुनुवाइ हुँदै

नागरिक उन्मुक्ति पार्टी नेपालका संरक्षक रेशमलाल चौधरीको रिटमा आज पेसी तोकिएको छ । 

चौधरीको रिट सर्वोच्च अदालतका न्यायाधीशद्वय नहकुल सुवेदी र अब्दुल अजीज मुसलमानको संयुक्त इजलासमा सुनुवाइका लागि पहिलो नम्बरमा राखिएको छ । आफ्नो उम्मेदवारी खारेजका सम्बन्धमा उनले आयोगविरुद्ध सर्वोच्चमा रिट दायर गरेका थिए ।

यसअघि गत माघ ११ गते न्यायाधीश बालकृष्ण ढकालको एकल इजलासले चौधरीले दायर गरेको रिटमा निर्वाचन आयोगसँग लिखित जवाफ माग्ने आदेश दिएको थियो ।  अन्तरिम आदेशका लागि सुनुवाइका लागि आज पेसी तोकिएको हो ।  अन्तरिम आदेशका विषयमा छलफलका लागि दुवै पक्षलाई उपस्थित बोलाएको छ ।

आगामी फागुन २१ गते हुने प्रतिनिधिसभा सदस्यको निर्वाचनका लागि कैलाली क्षेत्र नम्बर १ बाट मनोनयन पत्र दर्ता गरेका उनको उम्मेदवारी निर्वाचन आयोगले खारेज गरिदिएको थियो ।