काठमाडौं, फागुन २२ :
काठमाडौँ क्षेत्र नम्बर १ को अन्तिम मत परिणाम सार्वजनिक हुँदा अधिकांश उम्मेदवारले आफ्नो धरौटी रकम (जमानत) जोगाउन सकेनन्। सो क्षेत्रमा विजयी उम्मेदवारसहित जम्मा तीन जनाले मात्र आफ्नो जमानत जोगाउन सफल भए ।
कुल २९ जना उम्मेदवार चुनावी मैदानमा रहेकोमा २६ जना उम्मेदवारको धरौटी जफत भएको छ। नेकपा (एमाले) का उम्मेदवार मोहन राज रेग्मी सहित २६ उम्मेदवारको जमानत जफत भएको छ ।
राष्ट्रिय स्वतन्त्र पार्टीकी उम्मेदवार रन्जु न्यौपाने विजयी हुँदा नेपाली कांग्रेसका प्रबल थापा र राष्ट्रिय प्रजातन्त्र पार्टीका रवीन्द्र मिश्रले भने जमानत सुरक्षित गरे ।आफ्नो धरौटी जोगाउन कुनै पनि उम्मेदवारले कुल सदर मतको कम्तीमा १० प्रतिशत अर्थात् २ हजार ९०८ भन्दा बढी मत ल्याउनुपर्ने हुन्छ।
