काठमाण्डौ उपत्यकामा प्रदूषणको अवस्था अझै केही दिन कायमै रहने सम्भावना रहेको छ । तत्काल उपत्यकामा ठूलो वर्षा हुने अवस्था नरहेकाले वायुमण्डलमा रहेको प्रदूषणको अवस्था अझै केही दिन कायमै रहने सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
जल तथा मौसम विज्ञान विभागकी प्रवक्ता एवं वरिष्ठ मौसमविद् विभूति पोखरेलले आगामी तीन दिनसम्म अहिलेकै अवस्था रहनेदेखिएको र त्यसपछि क्रमश मौसममा सुधार हुने जानकारी दिइन् । उनले आगामी दिन देशभर मौसम बदली हुने देखिएको उल्लेख गरे । कोसी, वागमती, मधेश, र लुम्बिनी प्रदेशमा केही स्थानमा हल्का वर्षाको सम्भावना रहेको उनले जानकारी दिए ।
कर्णाली र सुदूरपश्चिम प्रदेशका पहाडी र हिमाली भूभाग तथा लुम्बिनी प्रदेशको तराई भूभागका एकदुई स्थानमा मेघगर्जन र चट्याङसहित हल्का वर्षा र हिमपातको सम्भावना विभागले जनाएको छ ।
काठमाण्डौ उपत्यकासहित देशका केही सहरहरूमा वायु प्रदूषण अत्यधिक बढेसँगै स्वास्थ्य मन्त्रालयले मानव स्वास्थ्यमा गम्भीर असर पर्नसक्ने भएकाले अत्यावश्यक कामबाहेक घरबाहिर ननिस्कन अपिल समेत गरिसकेको छ ।
