सभामुख डोलप्रसाद (डीपी) अर्यालले संसद्मा पत्रकारको पहुँच सहज बनाउने प्रतिबद्धता जनाएका छन् । संसदीय मामिला पत्रकार समाज र संसदीय रिपोर्टिङमा रहेका पत्रकारहरूसँगको भेटमा उनले संसद् र संसदीय समितिमा रिपोर्टिङ गर्न पत्रकारहरूको पहुँच सहज बनाउने प्रतिबद्धता जनाएका हुन्।
सभामुख अर्यालले हालको संसद् भवन अस्थायी संरचनामा रहेकाले केही व्यावहारिक कठिनाइ उत्पन्न भएको जनाउँदै नयाँ र स्थायी संसद् भवन निर्माण सम्पन्न भएपछि भौतिक संरचनाका कारण देखिएका समस्या समाधान हुने विश्वास व्यक्त गरे ।
संसद् परिसरभित्र पत्रकारहरूका लागि सहज र मर्यादित कार्यवातावरण सुनिश्चित हुन नसकेको भन्दै पत्रकारहरूले सभामुखको ध्यानाकर्षण गराएका थिए । पछिल्लो समय पत्रकारहरूले संसद् भवन प्रवेशमा कठिनाइ भोग्दै आएका छन् । सुरक्षा कडाइले समाचार संकलनमा अवरोध सिर्जना भइराखेको छ । संसद् र प्रेसको सम्बन्ध लोकतन्त्रको सुदृढीकरणका लागि अपरिहार्य रहेको सभामुख अर्यालको भनाइ थियो ।
