.webp)
वर्षौँको तयारीपछि अहिलेसम्मकै सबैभन्दा ठूलो फिफा विश्वकप आजबाट २०२६ सुरु हुदैछ ।
यस वर्षको प्रतियोगिता अमेरिका, क्यानडा र मेक्सिको ले संयुक्त रूपमा आयोजना गरेका छन्। प्रतियोगितामा पहिलो पटक ४८ टोली सहभागी छन्, जसले १६ वटा रंगशालामा कुल १०४ खेल खेल्नेछन्।
यो प्रतियोगिता ३९ दिनसम्म सञ्चालन हुनेछ।
विश्वकपको उद्घाटन खेल बिहीबार मेक्सिकोले दक्षिण अफ्रिकाविरुद्ध मेक्सिको सिटीमा खेल्दै प्रतियोगिताको सुरुआत गर्नेछ। यस खेलमा मेक्सिकोलाई स्पष्ट रूपमा बलियो टोली मानिएको छ। सोही दिनको दोस्रो खेल मेक्सिकोको ग्वाडालाजारामा दक्षिण कोरिया र चेक गणतन्त्र (चेकिया) बीच हुनेछ। यी चारै टोली समूह ए मा रहेका छन्।
क्यानडा र अमेरिकाले आफ्नो पहिलो खेल शुक्रबार खेल्नेछन्। क्यानडाले टोरोन्टोमा बोस्निया–हर्जेगोभिना सँग खेल्नेछ भने अमेरिकाले क्यालिफोर्नियाको इन्गलवुडमा पाराग्वे सँग प्रतिस्पर्धा गर्नेछ।
आज अर्थात जुन ११ का प्रमुख कार्यक्रमहरु
मेक्सिकोको उद्घाटन समारोह – मेक्सिको सिटी
मेक्सिको विरुद्ध दक्षिण अफ्रिका – मेक्सिको सिटी
दक्षिण कोरिया विरुद्ध चेकिया – ग्वाडालाजारा
मेक्सिको दक्षिण अफ्रिकाविरुद्ध बलियो दाबेदार
घरेलु समर्थकहरूको ठूलो साथ र भव्य उद्घाटन समारोहका कारण मेक्सिकोमाथि धेरै अपेक्षा गरिएको छ। उद्घाटन समारोहमा विश्वप्रसिद्ध गायक आन्द्रेआ बोचेल्ली तथा मेक्सिकन कलाकार अलेजान्द्रो फर्नान्डेज र माना को प्रस्तुति रहनेछ।
मेक्सिकोले सन् २०२२ को विश्वकपमा समूह चरण पार गर्न नसकेको निराशाजनक प्रदर्शनलाई बिर्सेर यस पटक उत्कृष्ट नतिजा निकाल्ने लक्ष्य राखेको छ। टोलीको नेतृत्व अनुभवी फरवार्ड राउल हिमेनेज र १७ वर्षीय मिडफिल्डर गिल्बर्टो मोरा ले गर्नेछन्।
गोलरक्षक गिलेर्मो ओचोआ ले विश्वकपमा कीर्तिमानी छैटौँ सहभागिता जनाउँदैछन्। अर्कोतर्फ, दक्षिण अफ्रिका आफ्नो चौथो विश्वकप खेल्दैछ र सन् २०१० मा आफ्नै देशमा आयोजना गरेको विश्वकपपछि पहिलो पटक प्रतियोगितामा सहभागी भएको हो।
उच्च उचाइमा हुने खेल
मेक्सिकोमा हुने खेलहरू उच्च भूभागमा खेलाइने भएकाले आगन्तुक टोलीहरूलाई कठिनाइ हुन सक्छ। मेक्सिको सिटीको अज्टेका रंगशाला समुद्री सतहबाट करिब ७ हजार ३ सय फिट उचाइमा रहेको छ भने ग्वाडालाजारा करिब ५,१३८ फिट उचाइमा अवस्थित छ।
त्यसैले त्यहाँ खेल्ने टोलीहरूले कम अक्सिजन भएको वातावरणमा आफूलाई अनुकूल बनाउन समय लाग्न सक्छ।
