कागेश्वरी मनोहरा नगरपालिका–५ वडा कार्यालयको आयोजनामा वडास्तरीय फुटसल प्रतियोगिता हुने भएको छ।
प्रतियोगितामा सहभागी हुने खेलाडी तथा टिमले तोकिएको मापदण्ड पूरा गरी आवश्यक कागजातसहित निर्धारित समयभित्र आवेदन दिनुपर्ने वडा कार्यालयले सूचनामार्फत जनाएको छ।
कार्यवाहक वडाध्यक्ष आत्माराम पौडेलद्वारा जारी सूचनामा प्रतियोगितामा सहभागी हुने खेलाडीले तोकिएको मापदण्ड र कागजात अनिवार्य रूपमा पूरा गर्नुपर्ने उल्लेख छ।प्रतियोगितामा सहभागी हुने खेलाडीका लागि राष्ट्रिय परिचयपत्र वा नेपाली नागरिकताको प्रमाणपत्रको प्रतिलिपि अनिवार्य गरिएको छ। साथै खेलाडीको यस वडासँगको स्थायी सम्बन्ध खुल्ने प्रमाणसमेत पेस गर्नुपर्नेछ।
वडाको स्थायी बासिन्दा भएका खेलाडीले भने स्थायी ठेगाना खुल्ने प्रमाणपत्र पेश गर्नुपर्नेछ। वडाको स्थायी बासिन्दा नभएका तर वडासँग पारिवारिक तथा सम्पत्तिगत सम्बन्ध रहेका खेलाडीले एकाघर परिवारको नाममा रहेको घर वा जग्गाधनी प्रमाणपुर्जा अथवा मतदाता नामावलीको प्रमाणपत्रको प्रतिलिपि पेश गर्नुपर्ने वडा कार्यालयले जनाएको छ।
वडा कार्यालयका अनुसार प्रतियोगितामा सहभागी हुने खेलाडी तथा टिमले आवश्यक कागजात यही असोज २२ गते बिहीबारभित्र वडा कार्यालयमा पेस गरिसक्नुपर्नेछ।
खेलाडी दर्ता तथा प्रतियोगितासम्बन्धी आवश्यक जानकारीका लागि वडा सदस्य शुसान्त श्रेष्ठ (९८६०४३७९३८) वा कागेश्वरी मनोहरा नगरपालिका–५ वडा कार्यालय, थलीमा सम्पर्क गर्न सकिने जनाइएको छ।
