भुटानको लेम्थाङस्थित हिमताल फुट्दा भीषण बाढी आएको छ। सम्भावित बाढीको जोखिमलाई मध्यनजर गर्दै १० हजारभन्दा बढी मानिसलाई सुरक्षित स्थान र आश्रयस्थलमा सारिएको छ।
भुटानको राष्ट्रिय सञ्चारमाध्यम भुटान ब्रोडकास्टिङ सर्भिस (बीबीएस) का अनुसार बाढीले गसा जिल्लामा रहेको प्रसिद्ध पर्यटन स्थल गसा छाछु प्राकृतिक तातोपानी क्षेत्रका पूर्वाधारहरू बगाएको छ। बाढीले दुईवटा बेली ब्रिज पनि बगाएको छ।
घटनामा हालसम्म कुनै मानवीय क्षति वा घाइते भएको खबर आएको छैन।
भुटानको लेम्थाङमा हिमताल फुटेको खबर प्राप्त भएपछि पश्चिम बङ्गाल प्रशासनले विपद् व्यवस्थापन संयन्त्रलाई सक्रिय बनाएको छ। सङ्कोश र मो छु नदी तटीय क्षेत्रमा बसोबास गर्ने बासिन्दाहरूलाई सुरक्षित रहन आग्रह गरिएको छ।
प्रहरीका अनुसार हालसम्म करिब ४ हजारदेखि ५ हजार मानिसलाई विद्यालय भवनहरूमा बनाइएका राहत शिविरहरूमा सारिएको छ भने ६ हजारभन्दा बढी मानिसलाई सुरक्षित स्थानमा लगिएको छ। पानीको बहाव केही घटे पनि प्रशासनले उच्च सतर्कतामा अपनाएको छ।
शिविरहरूमा सुक्खा खाना, पिउने पानी र शौचालयको व्यवस्था गरिएको छ। सङ्कोश नदी क्षेत्रका लागि रेड अलर्ट जारी गरिएको छ।
शिन्ताफु ताल भुटानका १७ वटा जोखिमयुक्त हिमतालहरूमध्ये एक मानिन्छ।
गत भदौ १० गते नेपालको भोटेकोशीमा आएको बाढीले थुप्रै जनधनको क्षति पुर्याएको छ । बाढीले घर बगाउँदा हजारौं मानिस विस्थापित भएका छन् ।
