डोल्पा कारागारबाट ८ जना कैदी फरार भएका छन् । शुक्रबार राति सदरमुकाम दुनैस्थित जिल्ला कारागारभित्रबाट सुरुङ खनेर उनीहरु फरार भएका हुन् ।
कारागारबाट सुरुङ खनेर फरार भएका आठ जना कैदीबन्दीको विवरण सार्वजनिक भएको छ । जिल्ला प्रहरी कार्यालय डोल्पाका अनुसार फरार हुनेमा पाँच जना जबरजस्ती करणी मुद्दाका र तीन जना चोरी मुद्दाका कैदीबन्दी रहेका छन्।
जबरजस्ती करणी मुद्दामा कैद भुक्तान गरिरहेका फरार हुनेहरूमा रुकुम पश्चिमको आठबिसकोट नगरपालिका-१० का राम विक, डोल्पाको त्रिपुरासुन्दरी नगरपालिका-७ का कालिप्रसाद रोकाया, त्रिपुरासुन्दरी नगरपालिका-४ का धनबहादुर बुढा भन्ने हरिबहादुर बुढा, सल्यानको कुमाख गाउँपालिका-५ का रेशम राना र जाजरकोटको बारेकोट गाउँपालिका-१ का यज्ञ विक रहेका छन्।
त्यस्तै, चोरी मुद्दामा कैद भुक्तान गरिरहेका जाजरकोटको नलगाड नगरपालिका-९ का कैलाश भन्ने कपिल परियार र रुकुम पश्चिमको आठबिसकोट नगरपालिका-५ का तिलक भण्डारी र वडा नम्बर ३ का आदेश भण्डारी पनि फरार भएको प्रहरीले जनाएको छ।
जिल्ला कारागारमा रहेका १७ जना कैदीबन्दी तथा थुनुवामध्ये आठ जना शुक्रबार राति सुरुङ खनेर फरार भएका थिए। शनिबार बिहान कैदीबन्दीको गणना गर्ने क्रममा आठ जना अनुपस्थित भेटिएपछि घटना सार्वजनिक भएको थियो। उनीहरुको व्यापक खोजी कार्य भइरहेको छ ।
