काठमाडौँ, साउन ३० :
डेंगु सङ्क्रमणबाट थप एक जनाको मृत्यु भएको छ । योसँगै डेंगु सङ्क्रमणबाट मृत्यु हुनेको सङ्ख्या दुई पुगेको इपिडिमियोलोजी तथा रोग नियन्त्रण महाशाखा (ईडीसीडी) ले जनाएको छ ।
ईडीसीडीले सोमबार सार्वजनिक गरेको तथ्याङ्क अनुसार देशका ७३ जिल्लामा डेंगु सङ्क्रमण फैलिएको छ भने तीन दिनको फरकमा २५५ जना थप सङ्क्रमित पुष्टि भएको छ ।
तथ्याङ्क अनुसार कोशी प्रदेशमा सबै भन्दा बढी ५८२ जना सङ्क्रमित रहेका छन् । यस्तै, सबैभन्दा थोरै कर्णाली प्रदेशमा ४७ जना डेंगु सङ्क्रमित रहेको ईडीसीडीले जनाएको छ ।
