नेपाली कांग्रेसका सभापति शेरबहादुर देउवाले सहकारीमा रकम बचत गर्नेहरूको रकमको ग्यारेन्टी हुनुपर्ने बताएका छन्। पार्टी केन्द्रीय कार्यालयमा शनिबार आयोजित कार्यक्रमलाई सम्बोधन गर्दै सभापति देउवाले आम नागरिकहरूले दुःख कष्ट, मेहनत गरेर सहकारीमा जम्मा गरेको लाखौँ रकम सहकारी सञ्चालकले अपचलन र दुरुपयोग गर्दा बचतकर्ताहरू पीडित भएको बताए ।
वर्तमान अवस्थामा सहकारी क्षेत्रमा देखा परेका विभिन्न किसिमका विकृति, विसंगतिहरुको अन्त्य गर्न जरुरी रहेको भन्दै उनले सबै सहकारीहरू सहकारीको सर्वमान्य आधार, मूल्य, मान्यता र सिद्धान्तअनुसार सञ्चालन हुनुपर्छ भन्नेमा पार्टी प्रतिबद्ध रहेको समेत बताए ।
कांग्रेसले सहकारीको मर्म र भावनाअनुसार समाजका विभिन्न वर्गको जीवनस्तर उकास्न सहकारी आन्दोलनलाई आम नागरिक समक्ष पुर्याउन अभियानको रूपमा बिस्तार गर्न लागिपरेको उनले बताए । सरकारले समयानुकूल सहकारी मैत्री ऐन, नियमहरूको व्यवस्था गर्नुपर्ने महसुस गरेर अध्यादेश ल्याएको सभापति देउवाको भनाइ थियो ।
