स्वर्गद्वारी गुठीको जग्गामा अधिकार माग्दै मोही किसान आइतबार घोराहीको सडकमा प्रदर्शनमा उत्रिएका छन्। माघ २० देखि माइतीघर मण्डलमा धर्ना दिइरहेका किसानको समर्थनमा उनीहरू सडकमा आएका हुन्।
सयौं किसानले झिंगौरास्थित थारु गाउँबाट र्याली सुरु गरी घोराही बजार परिक्रमा गर्दै आफ्नो मोही हक कार्यान्वयनको माग गरे। प्रदर्शनपछि उनीहरूले जिल्ला प्रशासन कार्यालयमार्फत सरकारलाई ध्यानाकर्षण गराए।
यसअघि लामो समयसम्म आन्दोलन गर्दा पनि सुनुवाइ नभएपछि दाङका ३९ किसान काठमाडौं पुगेका थिए। फागुन ८ देखि चैत ७ सम्म आन्दोलनपछि सरकारले वार्ता गर्दै गुठीसम्बन्धी कानुन तर्जुमा गर्ने सहमति जनाएको थियो। तर एक वर्ष बित्दा पनि कार्यान्वयन नभएपछि किसान पुनः आन्दोलित भएका छन्।
२०६२ चैत १४ को सर्वोच्च अदालतको परमादेशपछि किसान जग्गाको अधिकारबाट वञ्चित भएका थिए। स्वर्गद्वारी आश्रमको १०३४ बिघा जग्गामध्ये ७५३ बिघामा मोही कायम रहेको छ, जसमा ३ हजार ५ घरधुरीका १५ हजारभन्दा बढी सदस्य आश्रित छन्।
