काठमाडौं, माघ २९ :
प्रतिनिधिसभाका सांसद अमरेशकुमार सिंहले काठमाडौं महानगरपालिकाका मेयर बालेन्द्र साहले हिटलरको शैलीमा कार्य गरिरहेको आरोप लगाएका छन् ।
सोमबारको बैठकमा उनले मेयर बालेन साहलाई सिंहदरवार, संसद् भवन र सर्वोच्च अदालत भत्काउन चुनौती दिएका छन् । कबाडीमाथि चलाइएको डोजर र त्यस क्रममा मजदुर घाइते भएको घटनालाई जोडेर सिंहदरबार भत्काउन चुनौती दिएका हुन् । काठमाडौं महानगर भित्रबाट कबाडी हटाउने अभियानमा महानगरपालिका लागेको छ ।
सांसद सिंहले भने, ‘यो मेयर हिटलरजस्तै शैलीमा काम गरिरहेको छ । जर्मनीमा हिटलरको उदय भएजस्तै, ठ्याक्कै त्यसरी नै कार्यहरू भइरहेको छ ।’ सिंहले काठमाडौंलाई सातै प्रदेशको संघीय राजधानी भएको स्मरण गर्दै, यस्ता गतिविधिहरू नगर्न चेतावनी दिए ।
