राष्ट्रिय विपद् जोखिम न्यूनीकरण तथा व्यवस्थापन प्राधिकरणले भोटेकोशी बाढी प्रभावितका लागि स्थायी आवास निर्माण गर्न भौगोलिक अध्ययन भइरहेको जनाएको छ ।
सिंहदरबारमा सोमबार बसेको प्रतिनिधिसभा अन्तर्गतको हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समिति बैठकमा प्राधिकरणका भूगर्भविद् डा. प्रकाश पोख्रेलले भोटेकोशी बाढीले पूर्णरुपमा क्षति पुगेका स्याप्रुवेसी, बेत्रावतीदेखि त्रिशुलीसम्मका प्रभावितहरुलाई सोही क्षेत्र आसपासमा स्थायी आवास निर्माणका लागि भौगोलिक अध्ययन गरिरहेको जानकारी दिए ।
उनले बाढीको घटनापछि १६ वटा मोबिलाइजेसन टोली गठन गरी फोकल पर्सनहरू तोकेर खोज, उद्धार, राहत तथा पुनस्थापनाका कार्यहरू भइरहेको बताए । दुई वटा ल्याबमार्फत डिएनए सङ्कलन तथा प्रोफाइल तयार गर्ने काम भइरहेको भन्दै उनले १६ सय शवको डिएनएमध्ये हालसम्म १५० शवको पहिचान भइरहेको जानकारी दिए। एकमहिनाभित्र डिएनएको सवै काम सम्पन्न हुने जानकारी प्राप्त भएको उनको भनाइ छ ।
उनले सडक, पुल र झोलुङ्गे पुलहरूको अस्थायी तथा वैकल्पिक मार्ग निर्माण र प्राविधिक परीक्षणको काम पूर्वाधार विकास मन्त्रालयको नेतृत्वमा भइरहेको उल्लेख गरे ।
