काठमाडौं, फागुन ३ :
नेपाल बाल संगठनको जग्गा भाडामा लगाउँदा भएको अनियमितताका विषयमा राष्ट्रिय मानवअधिकार आयोगले छानबिन तथा अनुसन्धान सुरु गरेको छ ।
आयोगले स्व-विवेकीय क्षेत्राधिकार प्रयोग गरी अनुसन्धान लागिएको पनि जनाएको छ । संगठनकी तत्कालीन अध्यक्ष रीतासिंह वैद्यको संलग्नता रहेको तर सत्ता र शक्तिको आडमा उनीमाथि मुद्दा नचलाउने भनेर सरकारी वकिल कार्यालय काठमाडौंले निर्णय गरेको भन्ने विभिन्न पत्रपत्रिकामा समाचार प्रकाशन भएपछि आयोगले आफ्नो ध्यानाकर्षण भएको जनाएको छ ।
अनुसन्धानका लागि आयोगले उच्च सरकारी वकिल कार्यालय पाटन र जिल्ला सरकारी वकिल कार्यालय काठमाडौंलाई निर्णयको प्रतिलिपि तथा केन्द्रीय अनुसन्धान ब्युरो महाराजगन्जलाई अनुसन्धान मिसिलको प्रतिलिपि सात दिनभित्र उपलब्ध गराउन पत्राचार आयोगका प्रवक्ता एवं सहसचिव टीकाराम पोखरेलद्वारा जारी विज्ञप्तिमा उल्लेख छ ।
