नेपाली कांग्रेसका सभापति शेरबहादुर देउवाले आरक्षणको विषयमा नेपाल अग्रणी रहेको दाबी गरेका छन्।
बुधबार (आज)देखि प्रारम्भ भएको प्रजातन्त्र सेनानी संघको महाधिवेशनलाई सम्बोधन गर्दै उनले ३३ प्रतिशत महिला आरक्षणको प्रावधान संसारका थोरै देशमा मात्र रहेको बताए।
देउवाले आफ्नो पार्टीलाई पूर्ण समावेशी बताउँदै, यसले देशको समावेशीकरणमा पनि ठुलो भूमिका खेलेको उल्लेख गरे। उनका अनुसार, नेपाली कांग्रेस मात्र नभई नेपाल नै समावेशी समाजको रुपमा अघि बढिरहेको छ।
२५ वर्षपछि आयोजना भएको नेपाली कांग्रेसको भ्रातृ संस्था, प्रजातन्त्र सेनानी संघको महाधिवेशन आजदेखि १० गतेसम्म सञ्चालन हुने छ। देउवाले महाधिवेशनको सफलताका लागि शुभकामना व्यक्त गरे।
स्मरणीय छ, २०५३ सालमा पहिलोपटक प्रजातन्त्र सेनानी संघको अधिवेशन सम्पन्न भएको थियो र त्यसपछि आजसम्म चार जना अध्यक्ष चयन भएका छन्। संस्थापक अध्यक्ष कमल चित्रकारपछि तदर्थ समितिको नेतृत्वमा संस्था सञ्चालन हुँदै आएको छ।
