नेपाल बिमा प्राधिकरणका अध्यक्ष शरद ओझा विरुद्ध अख्तियार दुरुपयोग अनुसन्धान आयोगमा उजुरी दर्ता गरिएको छ। ओझाले अध्यक्षको पदमा आवेदन दिनु अघि बुझाएको कागजात फेक भएको आरोप लगाइएको छ, र यस विषयमा छानबिन गर्न माग गरिएको छ।
ओझाले आवेदन दिनु अघि क्लिकमाण्डु डटकममा प्रबन्धकको पदमा कार्यरत भएको कागजात प्रस्तुत गरेका थिए। उनीसँग बैंक, वित्तीय संस्था र बिमा क्षेत्रका कुनै अनुभव नभएको र उनका प्रमाणपत्रहरु एकै समयमा विभिन्न स्थानमा काम गरेको जस्तो देखिएको दिपेन्द्र बोहोराले आइतबार अख्तियारमा दर्ता गराएको उजुरीमा उल्लेख गरिएको छ।
साथै, ओझाको उमेरसम्बन्धी विषयमा पनि उजुरीमा टिप्पणी गरिएको छ। ३३ वर्षका ओझालाई प्राधिकरणको अध्यक्ष जस्तो उच्च र गरिमामय पदमा नियुक्त गरेको आरोप लगाइएको छ । यो उमेरका व्यक्तिका लागि पद अस्वाभाविक मानिएको छ।
प्राधिकरणको अध्यक्ष नियुक्तिका लागि गठन गरिएको सिफारिस समितिका संयोजक र सदस्यहरु, साथै अर्थ मन्त्रालयका वित्त क्षेत्र व्यवस्थापन महाशाखाका कर्मचारीहरूविरुद्ध पनि छानबिन गर्नुपर्ने माग गरिएको छ।
