प्रमुख सत्तारुढ दल नेकपा एमालेले लोकतान्त्रिक गणतन्त्र र संविधानको रक्षा गर्ने प्रतिबद्धता जनाउँदै, मुलुकलाई पश्चगामी दिशामा फर्काउने कुनै पनि प्रयास सफल नहुने ठोकुवा गरेको छ ।
पार्टीको सचिवालयको सोमबारको बैठकपछि उपमहासचिव प्रदीप ज्ञवालीले नेपालको सात दशक लामो संघर्षपछि प्राप्त लोकतान्त्रिक गणतन्त्रलाई उल्ट्याउने प्रयास निरर्थक र हानिकारक हुने बताए ।
उनले २१औं शताब्दीतिर पनि जन्मजात श्रेष्ठताको वंशगत शासनको बहस हास्यास्पद र निरर्थक रहेको जनाउँदै संविधानको प्रभावकारी कार्यान्वयन र राजनीतिक स्थिरता सुनिश्चित गर्न एमाले प्रतिबद्ध रहेको जिकिर गरे ।
एमालेले संविधान कार्यान्वयनको एक दशकको समीक्षा गर्दै लोकतान्त्रिक प्रणालीलाई थप सुदृढ बनाउने प्रतिबद्धतासमेत जनाएको छ । साथै बैठकले लुम्बिनी प्रदेश कमिटीले अनुमोदनका लागि पठाएको २८ नयाँ सदस्यको नाम पनि अनुमोदन गरिएको जनाएको छ ।
