चीनले अमेरिकी आयातमा ३४ प्रतिशत कर लगाउने घोषणा गरेको छ ।
अमेरिकी राष्ट्रपति डोनाल्ड ट्रम्पको बढ्दो विश्वव्यापी व्यापार युद्धमा नयाँ करहरू विरुद्ध जवाफी कारबाही गर्ने चीन पहिलो प्रमुख अर्थतन्त्र बनेको छ । यसले बजारहरूलाई गहिरो नोक्सानीमा पुर्याएको छ ।
विभिन्न देश र कम्पनीहरू दुवैले आफ्ना विकल्पहरू तौलिरहेका छन् भने युरोपेली सङ्घ (इयु) अमेरिकी अधिकारीहरूसँग वार्ताका लागि तयार रहेको जनाएको छ ।
सम्भावित प्रतिक्रियाहरूमा प्रतिशोधात्मक भन्सार शुल्क वा अन्य उपायहरू समावेश हुन सक्छन् । यसले व्यापार युद्धलाई बढाउन सक्छ र मन्दीको डर उत्पन्न गरेको छ ।
संयुक्त राज्य अमेरिकाको शीर्ष व्यापारिक साझेदारहरू मध्ये एक चीन सबै अमेरिकी आयातमा ३४ प्रतिशत भन्सार शुल्क अप्रिल १० देखि लागू हुने घोषणा गर्ने पहिलो मुलुक थियो । चीनले भन्सार शुल्कहरू माथि विश्व व्यापार सङ्गठन (डब्लुटिओ) मा मुद्दा दायर गर्ने बताएको छ ।
चीनले चिकित्सा प्रविधि र उपभोक्ता इलेक्ट्रोनिक्समा प्रयोग हुने केही दुर्लभ खनिज तत्वहरूमा निर्यात नियन्त्रण लगाउने पनि बताएको छ ।
न्युयोर्कको एस एन्ड पी ५०० सूचकाङ्क चार दशमलव आठ प्रतिशतले घटेको बिहीबारको उथलपुथलपछि एसियाली र युरोपेली सेयर बजारले आफ्नो घाटालाई बढाएका छन् । यो सन् २०२० मा कोभिड महामारीपछिको सबैभन्दा ठूलो गिरावट थियो ।
युरोपमा शुक्रबार दिउँसोपछि फ्र्याङ्कफर्ट पाँच प्रतिशतले घटेको छ भने पेरिस चार प्रतिशतभन्दा बढी र लन्डन तीन दशमलव आठ प्रतिशतले घटेको छ ।
टोकियोको निक्केई सूचकाङ्क दुई दशमलव आठ प्रतिशतले घटेको छ । जापानी प्रधानमन्त्री सिगेरु इसिबाले ट्रम्पको भन्सार शुल्कलाई ‘राष्ट्रिय सङ्कट’ का रूपमा वर्णन गरेका छन् ।
आफ्नो फ्लोरिडा गल्फ रिसोर्टमा सप्ताहन्तमा सेयरमा ‘उछाल’ आउने भन्दै ट्रम्पले पत्रकारहरूलाई बिहीबारको उथलपुथललाई खारेज गरेका थिए ।
उनले शनिबारदेखि लागु हुने गरी सबै राष्ट्रमा १० प्रतिशत आयात भन्सार शुल्क लगाउने र अर्को हप्ताबाट लागु हुने गरी दर्जनौँ विशिष्ट देशबाट आयातमा धेरै बढी कर लगाउने घोषणा गरेका छन् ।
विभिन्न देशहरूले भन्सार शुल्कको आलोचना गरेपनि चीन बाहेक उनीहरूले संयुक्त राज्य अमेरिकासँग वार्ताको प्रस्ताव गर्दै अहिलेसम्म प्रतिशोधात्मक उपायहरू रोकेका छन् ।
