काठमाडौं, चैत ३१ :
राष्ट्रिय स्वतन्त्र पार्टी (रास्वपा) का सभापति रवि लामिछानेद्वारा सर्वोच्च अदालतमा दायर गरेको निवेदनमा कैफियत प्रतिवेदन झिकाउने आदेश भएको छ ।
न्यायाधीश टेकप्रसाद ढुंगानाको इजलासले चैत २२ गते उच्च अदालत तुलसीपुर बुटवल इजलासले गरेको आदेशको आधार प्रमाण र कारणसहितको कैफियत प्रतिवेदन झिकाउन आइतबार आदेश गरेको हो ।
उच्च अदालत तुलसीपुरको बुटवल इजलासको आफूविरुद्धको आदेशविरुद्ध गत शुक्रबार सर्वोच्च पुगेको लामिछानेको निवदेन आइतबार प्रारम्भिक सुनुवाइका लागि इजलासमा पेस भएको थियो ।
बुटवलको सुप्रिम सहकारीको बचत अपचलनसँग सम्बन्धित मुद्दामा लामिछानेलाई उच्च अदालत तुलसीपुर बुटवल इजलासले गत चैत २२ गते पुर्पक्षका लागि थुनामा पठाउने आदेश दिएको थियो ।
