अमेरिकाको न्युयोर्कस्थित च्याम्पियन मार्सल आर्ट्स क्लबले करातेका मोहम्मद शेखु आलमलाई नगदसहित सम्मान गरेको छ ।
डिस्ट्रिक्ट ३० का एसेमब्ली मेम्बर स्टेभन रागाले शेखुलाई एक हजार अमेरिकी डलर र प्रशंसापत्र प्रदान गरी सम्मान गरेको क्लबका अध्यक्ष सुनील लामाले जनाएका छन् ।
शेखु यूएसए ओपन कराते प्रतियोगिता खेल्न हाल अमेरिकामा छन् । लस भेगसमा अप्रिल १८ देखि २० तारिखसम्म हुने प्रतियोगितामा शेखुले पुरुष ८४ केजीमुनि तौल समूहमा नेपालको चुनौती प्रस्तुत गर्नेछन् । करियरको १४ अन्तर्राष्ट्रिय प्रतियोगितामा शेखुले ५ स्वर्ण, ३ रजत र २ कास्य पदक जितेका छन् । त्यत्ति नै घरेलु प्रतियोगितामा शेखुले ९ स्वर्ण, १ रजत र ४ कास्य हात पारेका छन् ।
कार्यक्रममा नेपाली कम्युनिटीका लिडर नवराज केसी, कराते प्रशिक्षक मकेन्द्रबहादुर सिंह र जनकसिंह खड्का, तेक्वान्दो प्रशिक्षक पुष्प थापा मगरलगायतको उपस्थिति थियो ।
११औं दक्षिण एसियाली खेलकुद (साग) तथा १३औं एपीएसकेएफका स्वर्ण विजेता क्लबका अध्यक्ष लामाका अुनसार च्याम्पियन मार्सल आट्र्स क्लब यूएसएले आफ्नो नियमित प्रशिक्षणसँगै विभिन्न प्रतियोगितामा सहभागिता जनाउँदै आएको छ । त्यस्तै क्लबले सामाजिक कार्य र खेल क्षेत्रका साथै विभिन्न व्यक्तित्वलाई सम्मान पनि गर्दै आइरहेको छ ।
