चलचित्र ‘लाज शरणम्’ले प्रदर्शनको ५१औँ दिन मनाएको छ । शिवरात्रिको अवसर पारेर फागुन १४ गते रिलिज भएको चलचित्र आजबाट ५१औँ दिनमा प्रवेश गरेको हो ।
उच्च शोसहित प्रदर्शन सुरु गरेको चलचित्रमा अहिले पनि उपलब्ध शोमा दर्शकको अकुपेन्सी उच्च रहेको छ । यो सिनेमाले १३ हलहरूमा प्रदर्शनको ५१औँ दिन मनाएको छ ।
जेपीटी क्रिएसनको ब्यानरमा निर्माण भएको ‘लाज शरणम्’ ले काठमाडौं उपत्यकाका क्युएफएक्स, आईएनआई सिनेमाज, एफक्युब सिनेमाज, कीर्तिपुर सिनेप्लेक्स, बीएसआर मुभिज, रञ्जना सिनेप्लेक्स, बिग मुभिज, सीडीसी सिनेमा र मोफसलमा झापाको बिर्तामोडमा रहेको क्यूएफएक्स, दमकमा रहेको डिम्याक्स सिनेमाज र बुटवलमा रहेको आईएनआई सिनेमाजमा प्रदर्शनको ५१औं दिन पूरा गरेको निर्माता नवीन श्रेष्ठले जानकारी दिए ।
‘हाम्रो चलचित्र लाज शरणम् ५१औं दिनमा प्रवेश गरेको छ,’ निर्माता श्रेष्ठले भने, ‘दर्शकको राम्रो प्रतिक्रियासहति अहिले पनि उच्च अकुपेन्सीमा चलिरहेको छ ।’
पहिलो दिन एक करोड १० लाख रुपैयाँ ग्रसकलेक्सन गरेको ‘लाज शरणम्’ ले हालसम्म पाँच करोड रुपैयाँ ग्रसकलेक्सन गरेको निर्माता श्रेष्ठले जानकारी दिए ।
चलचित्रमा सीताराम कट्टेल, महेश त्रिपाठी, विजय बराल, अर्जुन घिमिरे (पाँडे), सागर लम्साल (बले), हरिश निरौला (कक्रोज), रेणु योगी, अर्पण थापा मुख्य भूमिकामा छन् ।
यस्तै, सिनेमामा कमलमणि नेपाल (खुपीका बाउ), मुकुन्द श्रेष्ठ, माला लिम्बूसँगै प्रियाना आचार्य (मुन्नी), बबिन राई (गल्फने बाजे), रामभजन कामतलगायत कलाकारको अभिनय छ ।
कर्णालीको कथाव्यथा प्रस्तुत गरेको ‘लाज शरणम’ लाई कुमार कट्टेलले निर्देशन गरेका हुन् । सुदीप बराल छायांकार रहेको चलचित्रको सहनिर्माता राम नरेश शाह र सिर्जना खड्का छन् ।
चर्चित हास्य सिरियल ‘सक्किगोनि’ समूहद्वारा निर्माण गरिएको यो पहिलो फिचर सिनेमा हो ।
