यस वर्षको फूलपातीमा प्रदर्शनमा आउने तयारीमा रहेको नेपाली चलचित्र ‘बलिदान’ को प्रि-टिजर सार्वजनिक गरिएको छ ।
यो भिडियो सामग्री चलचित्रका प्रमुख अभिनेता समीर भट्टको जन्मदिनको अवसर पारेर शुभकामना स्वरूप सार्वजनिक गरिएको हो ।
प्रि-टिजरमा अभिनेता भट्टका दमदार एक्सन दृश्य प्रस्तुत गरिएको छ । जहाँ देशभक्तिपूर्ण भावनाले भरिएको न्यारेसन सुन्न सकिन् - ‘देशको चिन्ता । माटोले खोज्दै छ जसलाई, जन्माइन् आमाले उसलाई । रगत उम्लियो जसको । आमाको पीर, यो देशको शिर, कहिल्यै झुक्न नदिने सपुत हुँ म ।’ भिडियोको अन्त्यमा समीरको आक्रोशपूर्ण चिच्याहटले दृश्यलाई अझ प्रभावशाली बनाएको छ ।
चलचित्रका निर्देशक सन्तोष सेनका अनुसार समीरमा कलाकारिता र अभिनयका सबै गुण भरिएका छन् । ‘बलिदान’ले ती सबै पक्ष उजागर गरेको छ । सेनले प्रि-टिजरलाई समीरको प्रस्तुतिको झलक भन्दै यो सिरिजमा थप झिल्काहरू क्रमशः सार्वजनिक गरिने जानकारी दिए ।
चलचित्रमा समीर भट्टसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायत कलाकारको अभिनय छ । ‘आसुसेन फिल्म्स् प्रालि’ को प्रस्तुति रहेको यस चलचित्रका निर्माता पवन ब्राडफोर्ड बिस्ट हुन् भने प्रेम पुरी कार्यकारी निर्माता हुन् ।
